Grischtdaags-Schtori nach Lukas 2, 1-14

1. An selli Zeit hot der Kaiser Augustus en Gebott nausg'schickt ass all die Leit in die Welt selle gnumbert sei. 2. Des waar's erscht mol ass all die Leit so gnambert waare, un's hott Blatz gnumme wo der Cyrenius Governer waar vun Syria. 3. Un alliebber hot sich grischt un is in die Schtadt gange vun sei Voreldere. 4. Un der Joseph is aa nuff gange vun die Schtadt, Nazareth, im Land Galilee-e zu die Schtadt, Bethlehem, im Land Judee-e. Des waar die Schtadt vum Daafit. Der Joseph is datt hie gange veil er vum Daafit sei Nochkummerschaft waar. 5. Er is datt hie gange fer sich nambere losse mit die Maria wo verschproche waar zu eem, un sie waar uff em Familyweg. 6. Un diweil ass sie datt waare, is die Zeit kumme ass die Maria ihre Kind hawwe hot selle. 7. No waar ihre erschder Buh gebore zu ihre, un sie hot ihn in Windle-Duch gwickelt, un hot ihn in en Fuder-Droog gleegt, weil's ken Blatz meh waar im Schloof-Haus. 8. Un in selli Landschaft waare Schoof-Hieder draus im Feld am ihre schoof-hiede deich die Nacht. 9. Un's iss en Engel vum Harr zu ihne kumme, un's heilich Licht vum Harr hot um sie rum gscheint, un sie henn zich gfeicht. 10. No hot der Engel g'saat zu ihne, "Feichet eich naett, fer ich bring eich guudi Zeie wo eich froh mache zehle, un wo zu all die Leit kumme zehle. 11. Fer zu eich iss heit der Heiland gebore wadde in die Schtadt vum Daafit. Er iss Christus der Harr. 12. Un des zehlt en Zeeche sei fer eich: dir finnet's Kind eigwickelt imme Duch un am imme Fuder-Droog leie." 13. Un uff eemol, waar en groosi Drubb anri himmlischi Engel bei demm Engel un sie waare am Gott lowe un henn g'saat, 14. "Groosi Ehr sei zu Gott im Heechschde, un Fridde uff die Erd unnich Mensche, die wo er froh is mit."